單車自由行 - Free biking life: Day 9

2011年9月25日 (陰, 連綿細雨)

鄉道 199甲 --> 鄉道199 壽峠 --> 接台九東源村 --> 達仁 --> 尚武, 大武 --> 金崙, 太麻里 --> 接台11到台東

尋晚有個車友撩我去睇日出, 但因為今日要挑戰環台路線最高點 - 壽峠, 再加上要踩100公里既山路, 我就婉拒左佢既好意. 只不過在下都不敢怠慢, 6點幾就起身, 7點就準備好出發.

其實本人黎講唔係好得空肚食早餐, 但呢間野咁鬼度縮都包埋咁就梗係食得唔好哂! 又幾好食喎貢丸面, btw 台灣人都好似好鐘意食貢丸, 係唔係都加幾粒落去咁.

我聽d 車友講到又九十度又要推又成咁, 所以我見到呢個牌寫7.5度時我仲係到諗pk 啦, 都未到壽卡就7.5 度, 後面推唔推到上去架?

雖然睇唔到日出, 又天陰陰咁, 但望落山既景色都相當唔錯.

踩(推)左一陣間就見到個牌, 心諗黎料啦

跟住見到個咁既牌, 然後我見到另一個車友, 我問佢, e 咁前面咪好斜囉? 佢話, 最斜既已經過去. 我心諗, 下唔係掛? 原來係碎料....... (謎之聲: 唔知邊個推車推左成粒鐘先行左7.5公里....)

過左最「辛苦」既7.5公里之後, 就係鄉道 199甲既起點, 即係我爬199甲既終點. 因為台灣既道路系統, 係由北到南咁跳錶, 所以我北上, 就係由尾爬返去起點.

最斜大約7.5公里. 我覺得所謂辛苦, 意思係指你唔肯落車推, 因為好瘀, 係咁踩, 乜都辛苦啦. 但你知我份人都比較隨意....hohoho

東源村, 其中一個原住民既部落. 台灣東面沿路都會有好多好多原住民族, 如果有時間可以入去一一細味一下....

又忍唔住係咁影......如果係天氣晴應該會超靚

如果想睇原大既朋友可以問我lor.

.....係咪即係悲戀湖殺人事件....(爛) [認真] 哭泣係d 原住民既意思係解作河流匯合點, 所以其實係一個好靚既意思, 一d 都唔淒涼

件事係要由入東源村開始講起. 一入東源村就見到平路 (有時仲過份到有落斜), 所以就轉返個波. 點知一轉就甩鏈, 應該係因為尋日落雨, 個wheel好濕, 條鏈係個wheel 到滑左落黎. 咁就上返條鏈啦, 無乜野特別. 點知行行下, 聽到架車有d 怪聲, 我就即刻落車睇下, 原來條鏈就黎斷. 點解張相out focus 呢? 因為我想再影既時候, 個天開始落雨, 時間係早上九點半. 我都唔敢再怠慢, 就啦啦聲連踩帶推咁將架車送去有得整既地方先.

其實我對單車保養既認識真係唔深, 係經過今次既旅程先有少少實戰經驗. 聽到架車有聲即刻check 下咩事係最基本動作, 而且要好細心咁觀察係邊到出問題. 因為咁既情況, 如果一上坡轉波段, 再發力踩個一下, 已經足以令成條鏈應聲斷開. 我就pk 啦, 仲有成十幾公里先到有修理單車既地方......所以呢個係保障自己既基本常識. 踩車無論任何時候都唔好聽歌呀. (仲可以聽到後面有無來車)

台9線分支點. 如果唔係墾丁有咁無敵既風景, 其實無乜人會兜咁大個圈由恆春半島走去台東, 而係直接爬過個山經台九線去到東面.

終於都捱到最高點 - 壽峠鐵馬驛站. 一入去我就問佢地借左個鉗, 但係我根本唔夠力鉗返埋去, 點算呢? 好彩咁岩有另一班車友在場, 佢地超熱心咁搶左我個鉗, 幫我鉗返個扣入去, 咁就暫時唔洗驚佢會勾到唔知乜野就成個變速器都 bye bye, 到時真係要半途而廢.

就係呢班伯伯同婆婆啦!!! 佢地仲要踩公路單車環島!! 超型呀, 真係夠歲做我呀婆呀公架啦!!

其實有關於壽卡, 我都唔想打太多, 因為一去google search 就真係超多. 呢到有條link 大家有興趣可以睇下, 個人覺得寫得唔錯. 維多利亞的廚房

簽名牆

「那一件瘋狂的小事叫環島」, 我諗我真係唔會再做, 頂多係揀一段, 得閒過黎踩下.

如果係逆時針環島, 199 既 0公里代表已經爬完坡, 後面有十幾公里既滑坡等緊你. 可惜既係因為天雨關係, 我滑坡都有就住就住. 但安全係最要緊的.

公公婆婆繼續上路了. 前面架機車係一個新竹年輕人機車環島, 因為單車環島太辛苦, 所以佢地超興機車環島.

終於捱到達仁, 呢個機車師傅應該有踩開車, 因為佢竟然連單車鏈都識整. 仲要只係象徵式收我 50蚊台仔. (我仲要打搞到佢既食飯時間tim.......)

呢個係午餐, 油雞面. 台灣d 面都勁大碗勁好食, 又平, 70蚊台仔, 又有茶飲, 又有電視.

話說入到黎呢間野, 部電視岩岩播緊呀gil 個套犀照. 有關於犀照係d 乜, 大家可以維基下: 犀照 - 維基百科

間野入面有對父子都係食緊野, 個仔問個老豆, 其實犀照即係乜意思. 我腦入面即刻諗起:

所以話呢.........不如過台灣發展啦.

之後去到尚武. 呢到係海風439. 提供單車環島免費住宿. 詳情請上google 自己search. 因為到達時時間尚早, 就無入去住, 繼續向台東進發.

真實視野, 好暗, 好厚雲, 雨一直無停過

黎到呢度, 已經四點, 我已經爬左80公里既山路, 一直上上落落, 仲要淋雨, 個肚餓到不得了, 就食前幾日買既面包. 企係呢個無敵大海景面前食呢個價值廿五蚊台仔既包做tea, 真係唔知可以俾咩感受.

七點半, 終於到達台東市中心.
總騎乘時間: 8:15:10
總里程: 95.85公里
平均速度: 11.5公里每小時
最高速度: 42.3公里每小時

細心既朋友可能已經發現, 點解均速會跌左咁多? 一黎落雨, 二黎東部多坡段, 三黎我體力開始下滑, 四黎有颱風我風濕腳發作. 所以環島其實如果分開黎環, 係無乜難度, 但如果一氣呵成, 而平時無踩開車, 係一個意志力既挑戰. 點解咁講呢? 其實無論點都一定踩到去, 你落車推都總會推到去目的地, 只係你肯唔肯同埋夠唔夠膽. 夜騎其實無問題, 只係比較危險同埋你心理質素下降. 不過講咁大段, 其實都係掩飾緊我「咋」姐 oh hohohohoh.....