Day 15 - 離開, 是為了回來

2011年10月1日 (陰, 驟雨)

基隆走新台5 --> 忠孝東路轉2乙 --> 承德路 --> 大度路 --> 關渡知行路租車瘋店前 (終點)

一早起來, 查了一下台灣氣象局的網站, 除左原先影響台灣個颱風 (吹左去香港個個), 太平洋仲生成左另一個颱風, 影響台灣東北部, 所以今日都係唔洗望, 又係刮風落雨. 

尋日已經死過翻生, 今日又打風落雨, 海線唔洗旨意啦 (後話: 之後幾日因為豪雨, 蘇花公路要封閉!). 因為我原先係想大環島, 由基隆返台北應該走台二, 經金山, 三芝, 淡水, 最後返到關渡. 全程七十k 左右, 其實都應該好輕鬆可以完成, 但可惜呢條係沿海路線, 小妹都係同淡水無緣架啦. 

點解咁緊張淡水? 其實要講返點解我同基隆有個約會. 因為阿信話:

「從屏東, 到基隆, 走過這麼多美夢! 」麥來亂 @ 五月天

咁同淡水有咩關係呢?

「走到淡水海岸~兩個人的愛情....已經無人看, 已經無人聽! 呀哈!」 志明與春嬌 @ 五月天

作為一個五月天既fan 屎, 今次旅程除左要鼓勵一下騎車風氣, 仲要promote 下五月天既歌呵~

講返正題先, 所以今日就揀左走內陸既省道5號, 主要連接新北市同台北市, 個正名叫新台5, 仲可以交流到國道3號, 由於係週末, 所以理應人多車多, 不過好彩 (?) 因為會落好大雨, 所以無乜人出門, 我今日都叫做幾順利 (?) 完成我既旅程. 

走台5其實總旅程時間唔會比台2 短, 因為台5 係走市中心, 九萬幾支交通燈又九千幾架車, 又要睇車又要睇人又要落雨 (死都要話人地落雨....), d 交通燈仲要支支都等成九廿幾秒, 所以都踩左好耐.

sao mui ted: 又落雨! bear!

一路踩都相安無事, 直到去到七堵區. 首先要說明一下台5未入台北市前都係天橋路黎, 去到七堵區有一個小小既出口, 踩到去呢個出口時只係早上十點. 之後又緩緩咁踩返上天橋.....突然間....

點解後太有d 漏氣聲既....................................

不消五分鐘既功夫就變成咁

其實爆太黎講都司空見慣, 要換都係十分鐘既事, 但係我發現外胎有破口, 似乎係玻璃碎...........如果外胎爆左, 我無能為力..........

唉

又黎tvb d 橋段, 問下問下, 原來七堵區有一千零一間單車舖. 但係佢要十一點先開門.....orz 於是就坐係到等佢

等佢個時, 個感覺都幾差. 我一路騎車, 去到邊到問路, d 人都好友善, 有d 甚至主動停車幫手. 但係返到黎台北, d 人見我行埋去問路, 佢竟然退後................! 我諗我係時候要switch 返去香港mode.

終於都等到佢開門, 原來係呢粒玻璃屑..........

換左外太, 搞到十一點幾, 終於都可以繼續出發. 係差不多入到台北市市界之前.............又無啦啦甩鏈, 仲要係上天橋轉彎位, 成條機慢車道得個米幾闊, 差d 俾d 機車撞死 =_=, 上完鏈又搞左一輪先見到原來後變速有一段仔都甩左鏈......我個時唔知點解個腦海會閃過劉華既天若有情..........點解最後一日最無任何問題既市中心悠閒單車日都要一波三折.............

終於都返到台北市, 一入市界就見到捷運站

原本入到台北市諗住搵野食, 但因為星期六所有店都客滿. 基本上我諗佢地expect 一個下午做一個turn over, 因為不設等位. 是但啦, 總之最後搞到3點先搵到地方有野食. 餓到連個條友同我介紹佢個餐牌我都唔識應佢. 所以話呢母語係你點迫一個人都無可能由廣東話變做d 唔知乜話, 唔係學唔識係呢個係一個人既根本黎, 如果太累係根本講唔到母語以外既話, 因為要經過思考先發到音.

是日總騎乘時間: 3:30:28
騎乘距離: 48公里
均速: 13.6公里/hr
最高時速: 41.4公里/hr

我今朝九點出發, 三點半到達, 食左半粒鐘飯, 即係中間有3個鐘係用黎等燈=_=

總騎乘距離: 1088.9公里

自行車新文化中心租的gps 所紀綠的旅程, 拿無花無假架 (綠色點一段為火車過蘇花公路)

終於都完成了! 下車個一刻感覺係好滿足, 覺得自己都俾左一個交代自己, 算唔錯啦! 每個人做每一件事, 或者生存, 都應該係有屬於自己既意義. 做呢件事俾我自己既意義, 我自己最清楚, 因為根本講唔得清楚俾第二個人知道, 而且對別人黎講呢份意義根本毫無意義. 

打呢篇終章既時候, 已經係16號. 完成左旅程之後既十五日, 回到繁忙既工作同埋學業, 流水式既人際交往. 但唔同既, 就係莫名重燃既騎車熱火, 同埋對養生同鍛鍊身體的急切想法同埋實際行動.

開始慢慢咁明白, 不是騎不動, 而是應該要停下來.

人生不應該只環一次島.