單車自由行 - Free biking life: Day 14

2011年9月30日 (陰, 晚上有雨)

羅東走台9 --> 宜蘭 --> 鄉道191 到頭城 --> 轉台二沿海 --> 八斗子 --> 基隆市中心

今日一早已經知道會係好艱辛既一天. 因為身體既狀況已經衰落到只能踩平路, 坡段一定要推車. 我唔知咁係因為心理狀況定係生理狀況, 不過總之就已經力不從心. 今日既路線係有整整一百公里要完成, 沿海既山坡路段, 會落雨, 又有颱風同東北季候風影響附近地方, 中間沒有停靠住宿的地方, 因為台二沿海只有零星的住宿點, 但問題是我十分清楚我既身體已經無辨法再支撐長時間騎乘. 所以唔可以再拖了, 今日一定要到達基隆市中心.

一大早八點就準備好出發, lor 個gps 出黎確認一下方向. e.........點解會收唔到 3g signal ge......

我諗我知發生咩事啦.

事源係咁的, 因為我個電話係用緊中華電信既 3g上網吃到飽週卡, 咁好記性既朋友應該都記得我對上一張係係高雄到出. 咁其實我出第一張時, 松山機場個姐姐同我講, 出咭當日係送俾我用, 之後先計日數, 所以根據呢個logic, 應該今日 (30號) 晚上23:59:59 先到期. 但係出咭當日其實係22號, 而我記錯左係23號, 所以呢張咭係尋晚 (29號) 23:59:59 就停左service........

都係唔好係到哂哂d 氣講粗口. 於是問下holiday inn 個姐姐, 最近既中華電信係邊到. 原來就係兩個街口以外. 好開心咁諗住去開咭, 點知佢個牌寫十點先開門.............不過都好過話今日公休......

於是, 我就踩左去宜蘭.............唔好哂左d 時間嘛......但係去到都九點未夠..........於是就坐低食少少野.........相都無心機影, 因為我．真．係．要．趕．路．呀！！！

終於都開門, 點知宜蘭間野無神神屎忽痕早左開門, 我一入到去....前面已經排左十幾個人.........

個過程唔講啦一講起就興, 總之又係到拋我話我唔出得又話呢又話路總之唔肯幫我做, 我話咁我之前個兩張都係中華電信出, 我手上keep 住個兩張廢咭就係證據, 定你呢度唔係中華電信? 唔好阻我時間啦我今日要去基隆呀姐姐..........

最後都係要我發揮香港人精神 - 拍台鬧佢兼叫哂佢所有上司主管出黎, 搞到十一點半先出到張咭.....................

拿即是咁, 你話我脾氣唔好諸如此類我無野想回應, 我只想反問咁係咪咁既情況都要好優雅咁話好呀唔該哂然後行出去間舖然後無左個gps 然後踩去d 了無人煙既地方跟住連自己去左邊都唔知又無人問路路牌都無個就係好好禮貌好好修養先? 拿唔怕得罪講句就係因為我呢d 性格, 先至可以做到好多其他人或者連諗都未諗過既野. 我唔知你個價值觀係點我亦都唔想知唔需要知但呢個就係我. 我會持守住我認為係合理既野. 我應得既我自己唔去幫自己爭取, 到時出事都係怪我自己. 我先唔會咁蠢.

其實我唔知點解一直都覺得, 個d bcaa 唔係淨係得丸裝, 肯定有運動飲料有添加 or 七仔有賣第二d 形式既bcaa

女人既直覺真係好準, 我勸各位男士都係唔好出軌

其實bcaa 既原理係阻止身體將肌肉消化為能量, 所以我認為應該係覺得疲倦無力之前就要食. 當時我唔知呢個原理 (亦好彩唔知), 總之飲左先算, 就係咁心理上好過左好多, 十二點未夠就到達頭城.

去七仔食個飯

對面個個係一個唔知國中生定高中生, 我一路食飯佢就一直坐係到, 但係個個時間唔係應該返緊學架咩? 咁我又唔係咁熟悉台灣既教育, 可能放飯break 呢你點知姐係咪先. 點知坐坐下有個好似黑社會大佬咁既十五六歲青年, 著便服既, 帶著另一班同呢位中學生著同一套校服既後生仔出現左, 呢個女仔無同佢地講任何野就跟左佢地走.............我個人認為似似地集體逃學.......

呢塊咁既野可以用黎當袋用, 攤返平佢又可以lor 去洗又再用過, 又環保又慳位又美觀又實用又唔會有倒汗水倒流落個飯到, 香港可否引入? (btw 我將呢塊野當手信帶左返香港)

家盈民宿, 哈哈

台2 沿海路段

有好多人釣魚同滑浪

漁港

因為今日係禮拜五, 所以好多遊客

踩到四點, 終於都入到新北市範圍

三貂角燈塔

這刻天空翻了風....

咁厚既雲層

仲要有無限咁多個上上落落既坡段.....

其時已經五點, 因為厚雲層既關係, 天已開始入黑, 過左龍洞隧道, 個天仲要落雨..................之後係下坡既路段, 有個好心既司機停低架車較低隻窗同我講, 原來我未開車尾既警示燈..........仲累到佢俾後面個司機砵.........我會記得你架好心司機! 而呢個舉動亦都提醒左我我已經返到台灣既北面了.........

當滑完坡的時候, 天色已經全黑, 雖然路已經變得平坦, 但雙線雙程的路上並無路燈, 只有經過小村莊時, 村莊入面有微弱既燈光射出來. 其餘路段, 雖未至伸手不見五指, 但連路牌都無法看得到. 左手邊, 是九十度的懸崖山壁. 右手邊, 是翻著驚濤駭浪的東中國海. 我面上流著的, 是不安的冷汗, 雨水同埋海水. 迎面而來的, 是強烈的海風加上東北季候風. 由於台2 太窄, 不設慢車道, 大卡車大貨車私家車不斷在我身旁以六十多公里時速呼嘯而過, 對面線的迎頭車輛的車頭燈有時會直射到我眼睛, 瞳孔收細, 根本無辨法夜視. 能見度只有廿米, 只要我一個不留神要緊急煞車, 就一定會滑倒, 被尾隨而來的車輛輾過. 沒有回頭路沒有停留的餘地, 我只能夠做的就是硬著頭皮聚精會神的騎下去.

我一定要到基隆. 我唔知道點解有個感覺, 如果我唔能夠遵守呢個約會, 我既人生就會玩完.

我係香港生活既時候, 一直有個感覺, 身邊既野都唔係真實, 我感受唔到我既心跳, 我既呼吸. 我好似都唔係生存緊咁. 人往往都係犯賤, 就係要置身呢d 咁極端既環境, 先至會尋回血肉既感覺.

晚上七點, 終於都到達瑞芳區間七仔. 後面的路, 開始有路燈了.

我捱過了一個半鐘頭的黑暗了.