單車自由行 - Free biking life: Day 13 - 遺憾與蘇花公路擦身而過

2011 年9月29日 (晴)

台9 瑞穗 --> 光復 --> 壽豐 --> 花蓮火車站 --> 區間車過蘇花公路 --> 蘇澳新站 --> 台9 線羅東

尋日落左成日雨, 夜晚仲要落傾盤大雨咁, 諗住今日都係落雨架啦, 點知一起身睇facebook, 原來個風打左去香港, 掛左好多年無掛既八號風球. 於是今日台灣就天氣晴啦.

其實打左咁多日, 都無乜點提過踩單車以外既生活係點過. 其實環島黎講如果係一氣呵成的話, 時間管理要做得好好, 咁先有充足既時間休息同埋準備第二日既旅程

由於要減重, 所以衫只係帶得兩套, 一套朝早踩車一套夜晚係城市活動, 所以洗衫係每日既指定動作. 搵住宿地方要有洗衣配套係首要既考慮因素, 通常我就會一去到就沖涼, 跟住洗衫, 晾衫, 再去食飯, 咁d 衫就唔怕乾唔切啦.

食完飯抖一陣就要檢查下架車, 如果落過雨就一定要洗走鏈條上面既沙, 如果唔係會整壞個變速器, 到時就哈里lu 也.... 洗完之後要加返d 油, 唔係條鏈會生鏽... 之後要check 下條太夠唔夠氣, 如果打氣打唔飽架車會踩唔郁, 不給力呀所謂既. 之後就檢查下個剎車夠唔夠緊, 較下坐墊既高度, 唔係個失頭哥會好難受.

如果空間許可, 我會將所有行李攤哂出黎, 晾一晚再執返入騎馬袋, 再者尋日落過雨, 雖然我既防水做得好好 (估唔到個大膠袋咁有用!), 但都要俾d 水氣走返出黎, 如果唔係輕則行李發毛, 重則整壞我d 電子野同藥品.....

充電就一定要架啦, 唔係又day 4 orz

整理好行裝就出發啦, 一踩出台9, 就撞返尋日係池上遇到個個高雄車友........因為今日目的地係八十公里以外既花蓮, 所以我地可以週圍去行下玩下.... 去到花蓮, 一定要去參觀既就係花蓮糖廠. 以前台灣好多地都用左黎種糖, 但因為經濟效益低, 慢慢都進口糖, 咁台糖呢間公司因為擁有好多地, 就用黎做其他生意, 加油站呀, 便利店呀, 全個台灣都會見到呢間公司既踪跡, 有d 似香港既太古.

觀光糖廠 (因為我唔記得較返個white balance + 戴住副超睇唔到隻色唔對路....)

雪糕雪條

高雄車友請我食的! 不過都偏甜, 踩車唔好食太甜, 會口渴

今日好好天氣, 可惜個相機較得唔好

得啦我知我個樣好衰, 個頭又唔知做乜

好靚既雲

離開左糖廠就繼續前進

有個人係到掛國旗, 應該係因為就黎雙十, 民國一百週年

人地民國一百週年, 都無周圍拉banner, 你話佢地唔愛國咩, 佢地比你更加關注自己既國家, 但係就係無呢個必要去做崇拜, 你睇下而家香港, 十月都未到就乜乜蝗國幾多週年, 年年都係咁唔煩架咩?

個太陽猛得滯, 食個飯避下先

呢間七仔個兩條八婆真係正八婆, 唔知係咪俾仔飛, d 態度仲衰過香港d 七仔. 俾著我係香港真係發作左. (又黎)

食食下聽到有野跌左落黎.....

原來係你!

之後就踩呀踩........遇返失散左既高雄車友, 話說天氣太熱, 我都唔勉強去追佢, 再加上小妹體力真係大不如前........之後佢話仲有少少時間, 不如去睇下個國家既三級古蹟. 於是我就追住佢 (拿佢係踩road bike + 踩左幾日, 我就踩 mtb + 踩左十幾日, 人地仲要訓練有數), 踩到盡廿幾k咁, 終於三點鐘就入到花蓮市中心.

吉安慶修院

日治時期d 日本仔留低既野

好耐都無見到咁好天唔洗著雨褸 TAT

洗手亭

佢地真係好鐘意cup 印

baby, 俾你既

盃盃 TAT

踩左十三日終於都見到台北兩個字 TAT

之後, 高雄車友知道我一直係到趕路, 要趕飛機返香港, 佢就送左我去花蓮火車站. 臨走我同佢講左句多謝, 我會記住你架!

坐區間車過蘇花公路, 單車要買半票, 唔洗拆碌唔洗入袋, 因為我有個張觀光局既唔知乜, 可以買學生飛

其實蘇花公路係可以踩單車過去, 但因為小妹體力不繼, 再加上前後幾日都連場大雨, 仲有颱風影響, 所以惟有坐火車過去.....

不過大家放心, 之後再有機會黎台灣放大假, 我一定會再環多次島, 補返蘇花公路一段!

台鐵幾年前洗心革面一改誤點兩三小時既作風, 而家所有既車種都十分準點, 大家記得要早d 去火車站等車呀

之後就推架車上月台. 你地自己諗下我點推架車上去.

唔好忘記我有六公斤行李 + 一架接近廿公斤既mtb

上到區間車就自動自覺去最後一架車廂

當settle 左之際, 見到有另一位車友都坐火車過蘇花公路. 我有少少覺得奇怪同好奇, 因為踩road bike 既佢無理由會放過蘇花公路一段. 後尾知道原來佢有家室, 好緊張兩個仔仔, 所以安全起見唔想冒任何既險. 當真係好爸爸呀!

呢個好爸爸係新竹從事電子工業, 應該係薪高位重既人仕啦. 一路上, 佢又幫我規劃路線, 又幫我檢查下架車. 跟住我同佢講我又爆太又斷鏈, 佢話佢踩左六日, 條太爆左六次, 所以我爆太係好正常既事, 識補就ok啦. 斷鏈方面, 佢又lor 佢d 工具出黎. 原來斷鏈要整返好容易, 但前提係你要有個好似老虎夾咁既野. 跟住又同我講d 車友都會食一隻補充劑, 叫做 BCAA, 係google 到search 左一下, http://blog.roodo.com/jinxiu/archives/1996072.html, 可以去單車舖到買到, 食左會比較無咁易抽筋同埋覺得累. 唉, 點解我無早d 遇到呢位好爸爸車友!

之後, 佢又得知我做邊行, 就話e 不如你黎台灣發展啦, 台灣既生活應該都好岩你. 我話我有計劃呀, 等緊個機會囉! 到時真係黎左, 又可以踩單車, 幾寫意!

check check 下, 佢問我, 你有無覺得起步同上斜架車好似踩唔郁咁, 我話有呀, 佢話因為我無lock 到個前避震, 所以個避震食左我好多踩落去既力. 於是我就lock 返佢. 一落到火車, 即刻different story.

落到火車站, 踩踩下, 我聽到佢架車有d 聲, 原來佢架車個前碌既鋼線鬆左, 我話咁係咪要換架? 佢話係呀, 但係一路無遇到merida, 之後踩多兩公里, 就見到有間merida (又黎tvb =_=), 我指俾佢睇 merida 呀!! 佢就好感激既眼神望住我, 其實台灣既人都幾愛車如命. 我係旺角銅鑼灣見到個d 名車既車主, 佢地應該都愛車如命, 但係個種感覺態度同眼神完全係兩回事. 算啦我認我偏心.

於是同呢位好爸爸告別之後, 我就好努力地向著羅東進發. 一路上碰到giant 既店, 就入去問佢有無bcaa 賣. 個位好運動員身型既爽快大姐就話無啦, 賣哂啦, 都無再返貨俾我地啦. 另一間大d 既giant 又公休, 你聽日十一點去宜蘭間新光三越就有得賣了. 但係羅東離宜蘭只係十公里, 再加上聽日我要踩100公里沿海路線, 我plan 左8點最遲要出發, 唔係就....所以bcaa 同我都係無緣份架啦.... (當然...到左聽日就有更加精彩既事情發生啦.....)