2011年9月19日 星期一 晴
三義走台13 --> 鄉道140 --> 錯信google 導航 --> 走返出台1 --> 清水 --> 轉走台17 到鹿港
經過尋日既教訓, 我今日痛定思痛, 決定要 1. 勁查地圖 2. 走返海線 3. 早d 起身, 所以今日我六點鐘就起身, 七點鐘就堅出發. 順帶一提gps + google 定位真係好準確. 可以信任. 但只限於定位...
 |
| 尋晚落腳既四季民宿 (係呀, four season ar) |
 |
| 不離不棄的伙伴, 非常可靠及可以信賴 |
 |
| 尋晚乜都無食, 今朝食返個包, 即叫即烤, 有煙飛出黎tim, 有一種暖暖的感覺從胃裏面浮上來 |
 |
| 又唔知乜鬼博物館, 咁影下 |
 |
| 離開左住既地方, 仲有兩公里左右既8度山坡要爬.... |
 |
| 但經過前兩日, 我雙腳已經開始適應, 而且同架車都開始有交流, 爬呢d 8,9 度既坡真係小菜一碟 |
過左兩公里既上坡, 就滑下4公里既坡. 基本上全程都keep 住三十幾四十公里/hour, 我唔洗踩, 只係需要係適當時候踩brake. 一陣陣迎面而黎既風, 尋日既疲勞都一掃而空
 |
| 滑完坡之後可以繼續走台13去后里, 但係我都係決定走返出海. 因為其實一直走海線, 就係佢地所謂既大環島. 走山線, 距離會短左少少. 所以今日就計劃走返出海線. |
 |
| 鄉道, 台灣既道路系統係咁, 有花花圍住個數字既係國道, 即係highway, 機慢車單車唔可以上去, 同埋幾十公里先有個出口, 倒三角既係省道, 機慢車單車可以上去, 都算係highway 既一種, 就係次一級, 之後到鄉道, 縣道, 鄉道同縣道有時差別好大, 有d 鄉道好似呢條咁, 勁靚, 勁平, 但有d 基本上係行唔到.....由於今日俾佢誤導左.....我聽日就會領野...... |
 |
| 好靚, 而且一直順風... |
 |
| 原來朱咪咪黎左台灣發展 |
跟住踩踩下就去到交流道, 發現我走唔返原本要走既台1 省道.....就lor 個gps 出黎睇, 原來因為風景太靚我miss 左個路口, 於是就走返轉頭. 終於都搵返個路口, 點知個路口塊地俾人用黎起緊野....無左條路....於是死死地氣走返轉頭.....去返大路轉台1.
一路走返回頭路, 覺得即時好洩氣. 因為我份人一直都係個d 永遠向前既人, 我最接受唔到就係原地踏步或者退步. 但係個point 係, 點解要覺得走回頭路係一種退步呢? 於是我漸漸理清思路...我諗我今次黎環島, 風景係其次, 我想要既, 係一種achievement. 我唔係想極速六日環完島個隻achievement, 係總之我想為廿五歲既我做一件事. 咁係咪即係我一直對當前既生活好唔滿意呢? 又唔係喎......只係我覺得, 人生原本就係無意義, 咁你一係就死左佢. 但係我又無咁既勇氣去自殺, 咁就活得精彩d 囉, 無咁悶嘛.
 |
| bear!!! |
 |
| 巨蟹座 |
 |
| 雙魚座 |
 |
| 台灣週圍都係呢d 宮, 深受車友既歡迎, 因為呢d 宮你可以隨便入去去廁所, 斟水, 甚至訓陣覺, 都唔會有人偷你野. 治安好到你唔信. |
 |
| 時間係正午十二點, 其實一入到清水區已經有少少唔舒服, 因為今日個太陽太勁, 體溫應該過高啦, 熱休克都係會死人, 反正今日唔趕, 所以就入宮訓陣覺. 訓到發夢呀大佬 |
 |
| 洗唔洗咁哂? |
 |
| 太熱, 要食冰, 好好食. |
 |
| 台灣既縣都係用河流黎做縣(or 市?)界, 一過呢d 橋就即係跨過縣/市界. 呢條橋既意思係由台中去彰化. |
 |
| 請問中文達人, 呢三個字點讀? |
 |
| 溫仔教會. good. |
 |
| 今日既目的地 - 鹿港 |
 |
| 晏就兩點未夠就到. 呢個係鹿港最出名既天后宮, 勁多大陸厘, 但呢個宮香火好鼎盛. 入面仲有太歲君, 月老等等. 我住左落黎之後特意去睇過, 諗住求返一支半簽, 但係諗黎諗去都唔知求咩, 唔係我咩都有, 而係我其實都幾滿意目前既生活, 如果問到既係好, 只係錦上添花, 如果問到唔好, 只係徒添煩惱. 所以拜拜, 祈求香港所有親友安好, 我一路平安,就走了. |
 |
是日騎乘時間: 4:55:58
距離: 74.14公里
均速: 15公里每小時
最高速度: 54.9公里每小時 |
 |
| chok 完未? 哂到成個非洲黎咁, 同埋真係瘦左又靚左 ~ |
 |
| 今晚既房間, 700蚊 |
 |
| 晚餐+早點, 全部加埋都係85蚊, 真係抵到好似唔洗錢咁 |
今日好輕鬆就完成左第三日既旅程, 而身體亦開始適應呢次旅行. 其實人既身體都幾奇妙, 短短三日就可以由office 狀態進入高體力消耗狀態. 踩一粒鐘單車消耗大約500至700大卡, 我今日踩左五粒鐘就係2500-3500個大卡, 我諗係平時既幾倍. 因為前幾日都耽誤左d 時間, 所以就有少少掙扎, 聽日要踩去邊. 如果由鹿港踩去佳里, 要100公里, 大概七至八個鐘, 如果去台南, 要百四公里, 要夜騎. 最後因為諗到, 都係踩公路姐, 夜晚無乜野既, 就選擇左要盡地一舖, 一日走百四公里.....亦令今次旅程第一次進入令我絕望既一刻...........
No comments:
Post a Comment