2011年9月18日, 星期日, 晴
路線: 新竹 --> 迷路後走台1 --> 竹南轉走台13 --> 造橋鄉迷路 --> 走台13 --> 苗栗走台13 --> 迷路 --> 台13 經銅鑼 --> 三義(氣絕)
 |
| 第一日已經哂到兩截色 |
 |
| 台灣好多情趣用品. |
 |
| 尋晚洗左d 衫唔乾, 架車會好重, 所以就算要搞到九點幾先出發都要去洗衫舖搞搞佢 |
 |
| 洗衫舖個師奶話要等一陣, 我就去佢介紹個早餐店到食早餐, 個呀姨都好熱情, 一聽到我話要環島就好搞笑咁話嘩好厲害耶!! 跟住係咁一輪咀問我點plan 點做咁..... 勁親切 |
 |
| 佢地一見到人就fing fing 尾咁 |
 |
| 我一行埋去想近影就即刻彈起撩我玩, 但原來佢個亮點係我隻熊公仔, 可能以為係玩具啩, 為左保護 Sao Mui Ted 所以我係咁二應酬左兩咀就走左 |
 |
| 大媽舞 is everywhere, 唔知呢啲係咪屬於中國文化呢? |
 |
| 有d 陰陰天, 以為會落雨, 攞個電話出黎睇, X, 原來行錯路 (編按: 粗口最多唔打出黎, 但為左完整透露成個故事, 以下會以「X」黎呈現) |
 |
| 熊仔呀! |
 |
| 由於我昨晚係俾熱情車友帶左去賓館 (誤), 所以我著實係唔知自己係邊, 亦唔知點走返出省道. 不過總之終於都上返台1, 踩出到去仲要多十公里先到竹南, 好彩尋日無硬頸住左新竹, 唔係第一日就皮已收. 台1 轉台13, 惡夢既開始 |
 |
| 一開波台13都無乜野, 呢個紅燒牛肉面幾好食, 好似百一蚊台仔, 同老闆確認左方向之後就去了 |
 |
| 之後就一直上上落落個山坡, 一至十五度到有, 仲要行行下唔知做乜行左上山區, 二十度真係推都推唔到上去.......都無心機影相, 又無野影, 跟住見到塊咁既野, 求其影下 |
即係呢到要補充一下, 當我打blog 個時, 可能係一張相一句話就完左成件事. 但當越踩越山越斜越萬里無人/雲時, 想到自己只得一個人, 雖然又有 GPS 又電話又成, 又有刀仔又有繩, 附近有啲民居 (但言語不通, 我唔識講台語), 又有充足既水同埋基本野外訓一晚既知識,但係都有一種好無助既感覺. 難道真係住得大城市太耐, 連一種生物與生俱來既求生本能都磨蝕哂.....
 |
| 行前多幾步影都無力 |
 |
去到苗栗又無神神上左山區. 踩踩下唔對路諗住走返轉頭, x. 超級大逆風.
|
嚟到呢度終於都覺得唔對路 (編按; 呢位小姐真係要仔都生埋先知俾人呃), 其實我一直都踩大馬路大公路, 點解都係會盪失路? 後黎我明白, 個問題係出係我唔熟悉台灣既路牌同埋交通系統, 我以為我已經準備得好好, 但係我個問題係我太focus 係裝備上面, 並無諗到「路」呢個最基本同重要既因素. 找對「路」, 又有勇氣去走既, 有幾多個人呢? 而咩先叫對既路呢? 你未走過, 又點知道呢? 所以好多人都無呢個勇氣去走呢條日思夜想既路, 就跟大隊走大路. 或者呢個就係成億上萬既人類, 成功例子只佔其中少於1%既原因. (編按: 呢位小姐講到咁偉大, 但係其實仲仍然未知自己其實行緊去邊或者條路啱唔啱...)
 |
| 踩過條橋, 平路, 以為明天會更好 |
 |
| 蒲公英田 |
 |
| 跟住睇 GPS, 見到有條短d 既路, 就去馬啦, 頂, 原來係 S 型既十五度上坡路....上到去幾咁有見到曙光既感覺.....上帝呀...... |
 |
| 但係落完又上.....水都飲鬼哂.....唔知上上落落左幾多個山坡, 終於都有水賣.....問下老闆佢話去后里仲有兩個大斜坡....其時已經五點 |
咁我係呢度諗住買水, 呀老闆娘問我要大定要細, 我以為係香港果啲 700毫升 VS 300毫升既大細比例, 咁我就話要支大既, 佢就攞左支 2L 出黎. 唔洗啦, 仲有唔知幾多座山要爬, 我要返支細架啦.
 |
| 沒完沒了呀大佬. 但係我覺得自己好勁囉已經撐左四十三公里. |
之後去到三義, 原本再要過多 6-8公里就到是日終點后里, 但係我已經氣絕, 仲要天黑, 再踩應該要連人帶車用直升機吊住返香港. 無辨法之下唯有住三義. 三義係一個非常鄉下既地方, 因為要到三義一定要爬山坡, 同苗栗一樣係西面近海少有既山區, 一直發展好落後, 但當市區日漸增多, 台灣發展成為旅遊區, 就變成好山好水 但係當我踩住架車, 個心又急要趕路, 咩山咩水係我眼中都變成「到未呀老細....」
由於我搵唔到住既地方, 所以就走入七仔問有無民宿, 個師奶就介紹左一間民宿俾我. 當我係去緊間民宿既途中, 有間van 仔一路跟係我後面, 然後就停埋左一邊, 有個女仔落左車, 走埋黎...
女仔: 你好呀, 我係七仔聽到你搵唔到住既地方, 你今日原本係去邊架?
我: 我原本係要去后里
女仔: 咁不如我地車埋你去啦 (因為van 仔可以放單車 + 我)
我: 我知你想幫我, 但我諗唔到你點幫我, 因為我環緊島, 唔可以坐車
女仔: ....咁好啦, 我明白啦, 你要加油, 一定會踩到的
台灣既人好熱情, 好有善心, 不過我份人就係咁硬頸. 你放心啦, 我永遠都會記住你地架 :)
「最, 愛我的人別緊張, 我的固執很善良, 我的手越骯髒, 眼神越是發光」
 |
| 謝謝 :) |
跟住踩踩下, 就係一個勁黑暗無街燈勁多車既上斜路上面, 見到有個人揮住個大光燈搵我叫我轉入一條小路到. 原來小七既店員同個師奶幫我聯絡左間民宿既老闆叫佢出黎接我呀.
 |
| 是晚住三義四季民宿, 九百蚊, 其實係好平, 因為間房suppose 係俾五六個人訓, 而且好企理好正, 陳大哥仲係一個經驗老到既導遊, 大家想去三義大甲火炎山九華山等景點要搵佢啦. 洗衫之後有脫水機用 (編按: 此為嚴選台灣十大最偉大發明), 所以可以洗哂d 野, 一晚就乾了 |
 |
| 呢一日攰到飯都食唔落. 係呢到, 我決定要將每年既九月十八日定為斜路日. 是日係唔會行任何既斜路. 直到呢個世界唔再存在斜路為止. 雙腳已變兩截色, Sao Mui Ted 話顯得佢好白喎. |
今日係第二日.....感覺今次呢個trip 係我呢世人做過十大最硬膠既事情之一. 但係我都學習左一件事情, 就係學識左對路牌好敏感, 同埋要不厭其煩咁係咁check 住個 GPS, 唔係到頭黎都係自己攞黎衰. 另外我終於明白點解唔好夜晚趕路, 因為本身已經好累, 又心急, 仲要睇唔到路, 心理質素會好差, 非常容易出事. 做人做事都一樣, 心理質素真係好重要. 呢一晚感覺好差. 好無安全感, 但都有一直提自己要有平安既心, 呢樣係黎緊第三日幫左我好多, 終於都可以relax 咁享受個trip, 同埋感覺係為東面既山坡路做一個預習, 仲幫我練成第三日既鐵腿.....
 |
是日騎乘時間: 6:13:35
距離: 76.75公里
平均速度: 12.3公里每小時
最高速: 51.8公里每小時
|
拿, 睇均速就知基本上都係山路, 因為平路小妹踩到17 至18左右, 7度斜路可以斜到7公里/小時, 但係最高速有成51.幾, 可想而知條斜路係幾咁斜. (編按: 真係好 scientific) (小編被圍毆中)
No comments:
Post a Comment