紅磡來回屯門 - 沉睡了的東方之珠 (騎車膝痛的原因)

27th nov 2011, 騎乘距離: 75.97公里, 騎乘時間: 4:23:26, 均速: 17.33公里每小時, 攝氏20度, 無雨

google map route

好久無出車了, 一黎懶二黎多野做. 今晚有d 凍, 出車前都無諗咁多去邊. 於是踩踩下, 踩踩下, 就踩左入屯門...

其實點解會係咁踩, 一黎禮拜六嘛, 唔急既. 二黎其實我好憎走回程, 理由可以參考我環島day 4. 夜晚係香港市區走黎走去, 感覺真係好爽, 無乜人無乜車咁. 香港地係我屋企, 無容置疑, 但我真係好憎香港既人. 自私, 公利, 不友善. 因為環島時, 踩車過程當你遇到車友, 係會好自然傾兩句或者最基本會打個招呼, 叫聲加油. 搞到我習慣左一見到車友都會打個招呼咁. 呢晚都遇到好多車友, 但係回應我打招呼既得兩個人. 都係上左年紀有返咁上下車齡既車友. 唉. 仲要踩返屯門d 「單車徑」, 係香港踩車都有時真係唔係幾開心........

每一次係香港踩車都會好感受到我好愛呢片土地. 香港既文化, 廣東話既奇趣, 做事效率等等, 但係香港人越黎越bull shit, 香港d 狗官更加唔好係到講, 簡直係提起都沾污左我個blog. 就好似d 九巴佬咁, 你公司對你唔好你就發洩落d 乘客同其他道路使用者身上, 你話你係咪抵你成世咋巴士?

所以當夜蘭人靜, 個個訓哂個時, 靜靜地踩住架車, 望住身邊既景色, 充滿回憶既街道, 寧靜既思考空間, 呢d 都係我選擇夜晚踩車既原因.

今次踩車都有d 收鑊, 其實多得屯門公路, 青山公路比較少車, 所以司機們都比較有耐性同埋禮讓, 而且路比較闊同埋相對市區黎講比較少起伏, 再加上我尋晚踩時遇到警察路障, 都無比人逗, 所以我諗早上踩都應該ok. 青山公路由荃灣到屯門紅橋一段大約20 公里, 都係比較平坦既路, 所以我都踩得比較爽. 以後如果係見到太陽時想踩車, 我會選擇火車入荃灣西避開市區路一段, 或者紅磡搭西鐵到美孚由荔景山路葵福路上入荃灣西再開始踩....原因嘛留意下一篇誌記吧! 是有關於坡路段訓練的.

只係今次可能因為太凍, 兩個膝頭哥又黎超痛.........我諗護膝既錢都係無得慳...