2011年11月5日星期六

單車自由行

呢個blog 大大話話都改左三次名, 第一次個名叫做「台灣單車環島遊」, 擺明就係勁hae 既名, 因為我都無預計到會有咁多訪客, 所以都無乜花心思落個名到. 第二個名叫做「那一件瘋狂的小事叫環島」, 呢個名有咩典故呢? 就要講返其實小妹有一個好欣賞既內地藝人, 佢叫袁泉, 曾經出過一張專輯叫做「孤獨的花朵」. 咁張專輯入面有一條side track, 叫做「那一件瘋狂的小事叫愛情」. (咁至於點解會咁欣賞佢呢就太off topic 啦, 你地真係有興趣想知就問我啦) 咁開初都無為意呢首歌, 後尾九月初時, 剛好係皇后樂隊個主音 Freddie Mercury 既生忌, google 就出左專題title, 咁我本身對皇后樂隊係零認識, 只係好偶然咁聽過一次佢地既名亦知道佢地係其中一隊七八十年代非常經典既樂隊. 當我click google 個專題title 時發現佢地其中一首成名作就係 crazy little thing called love, 我先至如夢初醒原來袁泉首side track 係致敬曲. 咁當時係仲未諗住將個blog 改做呢個名, 係當我踩到去壽卡個時, 好深深咁體會到其實環島呢件事真係同愛情一樣, 係非常瘋狂而深刻, 會改變你一d 野又會令你難捨難離, 於是就好自然咁將個blog 改做「那一件瘋狂的小事叫環島」.

至於「單車自由行」呢個名又點黎架呢? 其實當我決定將個環島blog 變成我既單車誌記blog 時都仲未諗住要改名的. 係有一次係香港踩踩下車, 就係到諗點解我唔鐘意跑步但係咁鐘意踩車? 諗諗下就諗通左其實由細到大鐘意踩車既原因都係得一個, 就係踩車好自由自在. 細個個時呀婆湊我, 佢管得我好嚴. 唯一可以俾我自己決定哂所有野既時候, 就係落街踩車既時候. 到而家大個左, 當然自由度極大啦, 但踩車時個種自由既感覺, 目前黎講都仲係無野可以取代到. 行路太慢, 坐車太快, 踩車岩岩好, 而且可以踩去任何既路, 可以走任何方向 (安全情況下 =_=), 唔洗擔心油既問題, 迎面吹黎既風, 沿路見到既風光明媚, 耳邊既風聲車聲鳥聲草聲, 皮膚直接同大自然做最親密既接觸.........

我唔係無腳雀仔, 說實在小妹下年年尾就結婚, 但係我天性就係不羈放縱愛自由, 再加上小妹係讀生物, 可以咁自由自在同大自然做咁親密既接觸, 就係「單車自由行」呢個名既意思.

沒有留言:

張貼留言