坡路段的藝術

我曾經係一個車友既blog 到, 睇過佢對於踩車既感想. 佢話一個真正愛踩車既人, 一定係一個唔會咁容易放棄既人, 因為單車有一種好奇特既魔力, 當你一路向前既時候, 齒輪一直咁轉動, 你會不自覺咁都一齊跟住轉, 直至你意志力耗盡, 你先至會識得停低. 如果你既意志力只能夠俾你去到十k 就要返屋企, 你根本唔會再有下一次既騎乘.

在下表達能力唔係幾好, 但大致上係咁既意思啦. 其實呢句說話, 係踩長距離坡段既路段, 係更加有明顯既感受. 踩車既朋友, 都一定會有一個想法: 上坡, 係為左更美既風景同埋暢快既滑坡體驗. 只但是, 就算滑坡有幾咁暢快, 都唔可以樂極忘形.

話說今日我去左旺角d 單車舖到shopping, 去到某一間店既時候見到有個包紮住既年青人係到拆車. 其實都司空見慣我都無乜特別留意, 但後來唔小心聽到佢同店員對話, 推測到佢拆緊個架車應該係佢本人, 佢因為摔車受傷而想放棄踩車, 就想拆散架車, 但個店員就係咁勸佢唔好放棄. 其實我見過好多有經驗既車友, 佢地對於爬坡同滑坡既看法都非常類同, 就係爬坡要鬥快, 滑坡要鬥慢. 雖然我唔知個位摔車既車友係因為咩事而發生意外, 或者係因為路面車多人車又爭路而出事, 但佢地既對話都令我想起呢句警世名言. 共勉之.